Die adrenalien bruis al van vierjarige ouderdom deur Ashique Panday (18) van Parktown Boys High se are as dit by motorfietse kom.

Sy voorliefde vir super-motorfietse het egter nie in dié aspirant-hartspesialis se pad gestaan om sewe A’s in die matriekeksamen te behaal nie.

Ashique, van Crosby, Johannesburg, het onderskeidings in Afrikaans, Engels, wiskunde, rekeningkunde, lewenswetenskappe, fisiese wetenskappe en lewensoriëntering behaal.

Dié enigste kind van Leon (47), ’n bemarking- en sakeontwikkelaar, en Shah (45), ’n tuisteskepper, gaan Tukkies toe om sy mediese graad te verwerf voordat hy in hartchirurgie wil spesialiseer.

“Hy is altyd gefokus. Hy weet waaroor die lewe gaan,” sê Panday sr. trots.

Harde werk word beloon, verduidelik die Pandays.

“Sedert hy klein was, is hy geleer om vir iets te werk. As hy goed doen, kry hy ’n kwadfiets. So het hy sy Kawasaki Ninja 636-motorfiets vir sy 17de verjaardag gekry. Met dié onderskeidings kry hy ’n nuwe motor vir universiteit,” sê sy ma.

Ashique, wat homself as sowel “selfversekerd” as “nederig” beskryf, se gunstelingvakke is wiskunde en biologie.

Ná ’n vakansie in KwaZulu-Natal ontspan hy tuis voordat sy mediese studies van byna 15 jaar eersdaags begin.