Die eerste skooldag verloor nooit sy "magic" nie, sê Lynn van Jaarsveld, hoof van  Trinityhouse Little Fall se pre-primêre skool. Die kleuterskool spog met niks minder nie as tien tweelinge. 

Januarie was 'n maand vol eerstes vir die skool. 

Die leerlinge van Trinityhouse Preparatory School het 'n splinternuwe skoolgebou. Die baksteen-en-staal-tweeverdiepinggebou het mooi ontwerpte klaskamers, biologie- en rekenaarlaboratoriums en 'n saal. Die saal is die middelpunt van die gebou en is die grensgebied tussen junior en senior klasse.  

Hennie Strydom, die hoof van Trinityhouse Preparatory, sê die onderwysers geniet die nuwe gebou net soveel soos die kinders en hulle het al die stoppe uitgetrek om die leerlinge 'n puik leer-omgewing te bied. 

Die hoërskool begin ook vanjaar met 'n gr. 8- en gr. 9-klas. Hulle deel tydelik die nuwe gebou met die laerskool, totdat hulle hul eie vleuel kry.

“Dis 'n opwindende groeifase en ons is in ons skik met die geesdrif van ouers en leerlinge oor die nuwe senior grade by Trinityhouse. Ons sien uit daarna om 'n sterk en vooruitstrewende akademiese kampus te vestig," sê  Lynne Davis, hoof van die hoërskool.